Nukissiuutinik atuiniviit 3,4 pct.-imik qaffapput
2023-mi nukissiuutinik atuineq 9.976 TJ-usimavoq 2022-mi nukissiuutinik atuinermut sanilliullugu 3,4 pct.-imik qaffasinneruvoq, 2022-mi nukissiuutinik atuineq 9.646 TJ-usimavoq. Nunap iluanitolianik atuineq tamakkiisumik 3,7 pct.-imik qaffassimavoq.
Silap pissusaa tunngavigalugu nukissiuutinit atukkanik iluarsiineq 5,8 pct.-imik qaffassimavoq
Nukissiuutinik atuiniviit saniatigut silap pissusaa tunngavigalugu nukissiuutinit atukkanit iluarsiinerit Naatsorsueqqissaartarfimmit aamma suliarineqarput, Silap pissusaa nalinginnaasumit allaanerusimagaangat silap pissusaa nalinginnaasoq tunngavigalugu nukissiuutinit atukkanik iluarsiisoqartarpoq. Taamaasilluni ineriartornermi allannguutit ersersinneqartarlutik. 2023-mi silap pissusaa tunngavigalugu nukissiuutinik atuineq 10.232 TJ-usimavoq, 2022-mut sanilliullugu 5,8 pct.-inik annertunerulluni.
Nukissiuutiliorneq pingaarneq annertusivoq nammineq pilersorneq annikillisoq
2023-mi Kalaallit Nunaanni nukissiuutiliorneq 1.805 TJ-usimavoq, 2,1 pct.-imik annertusisimalluni. Nukissiuutiliorneq annerpaaq erngup nukinga atorlugu aamma eqqakkanit pisarpoq. Kalaallit Nunaanni nammineq pilersorneq 17,6 pct.-imut apparsimavoq ukioq sioqqullugu 17,9 pct.-iusimasoq. 2023-mi nukissiuutiliornerup pingaarnerup annertusisimanera aamma nammeneq pilersornerup annikillisimanera, avataanit ikummatissanik atuinerup annertusisimanera pissutaavoq. Avataani ikummatissanik atuinerup qaffasinnerusimanera pissutaalluni nukissiuutinit nammineq pilersuinermit atuinermut sanilliussinermi 2023-mi nukissiuutinit nammineq pilersuinermut atuineq appasinnerulersimavoq.
Innaallagiamik pilersuineq annerpaaq nukissiuutinit ataavartunit pisarpoq
2023-mi Nukissiorfiit innaallagiamik tunisassiornera annerpaataa, tassa 82,3 pct.-ia imermik nukissiornermit pivoq. Nukissiorfiit katillugit 2.101 TJ-mik innaallagissamik tunisassiorsimavoq. 2023 aallarnerfigalugu Nukissiorfiit mittarfeqarfinni, Narsarsuarmi Kangerlussuarmilu, innaallagiamik kissamillu pilersuineq ingerlatilerpaat.
Drivhusgassinik aniatitsineq annertusivoq
Nukissiuutinit atuinernit drivhusgassinik silaannarmik mingutsitsineq tamarmiusoq 2023-mi 3,7 pct.-imik annertusivoq, 609.117 ton CO2-ækvivalentiulluni. 1990-imut sanilliullugu 2023-mi silaannarmik mingutsitsineq 2,5 pct.-imik appasinneruvoq.